Uppbygging í hjarta Hafnarfjarðar

Hugmyndir að metnaðarfullri uppbyggingu í miðbæ Hafnarfjarðar voru kynntar á fundi bæjarráðs Hafnarfjarðar í júní 2021. Fyrri áform um uppbyggingu á 100 herbergja hóteli að Strandgötu 26–30 í Hafnarfirði hafa þróast í spennandi hugmyndir og áform um matvöruverslun og þjónustu á jarðhæð, nýtt nútíma bókasafn og margmiðlunarsetur, almenningsgarð á 2. hæð og hótelíbúðir í smáhýsum sem liggja við Strandgötuna.

Framkvæmdir hefjast haustið 2022

Framkvæmdir við uppbyggingu á byggingarreit sem afmarkast af Strandgötu 26-30 (nú Fjarðargötu 13-15), hófust á haustmánuðum 2022. Gert er ráð fyrir að framkvæmdir taki í það minnsta tvö ár og mun uppbyggingu fylgja töluvert rask og truflun fyrir íbúa og umferð á svæðinu. Aðalteikningar vegna Strandgötu 26-30 (nú Fjarðargötu 13-15) voru samþykktar í lok september 2022. Verkefnið er leitt af félaginu 220 Miðbær ehf sem er eigandi byggingarreitsins.

Áhrif framkvæmda

Gert er ráð fyrir að jarðvinna hefjist í nóvember 2022, uppsteypa hússins verði unnin að mestu árið 2023 og húsið verði tekið í notkun í árslok 2024 og fram eftir ári 2025.

Húsbyggjandi mun leggja áherslu á að valda sem minnstri röskun fyrir íbúa og vegfarendur á meðan á framkvæmdum stendur en ljóst er að ekki verður komist hjá ákveðnum truflunum. Þrenging verður gerð að Strandgötu. Gangstétt öðru megin verður lokuð og gangandi umferð færð yfir götuna. Aðkoma að byggingunni fyrir framkvæmdaraðila verður á þremur stöðum; frá Strandgötu, frá bílastæði við Hafnarborg og frá svæði bak við Strandgötu 24. Búast má við efnismóttöku á þessum stöðum. Eins er gert ráð fyrir að á meðan steypuvinna stendur sé hjáleið fyrir umferð ökutækja á bak við Strandgötu 31 og 33.

Helstu tölulegar upplýsingar

• Samtals lóðarstærð: 1.881,4 m²
• Hámarksbyggingarmagn: 7.045 m²
• Hámarks nýtingarhlutfall án bílageymslu: 3,74
• Hámarks nýtingarhlutfall með bílageymslu: 4,74
• Hámarkshæð: 28 m

Framkvæmdir vegna endurnýjunar hitaveitu á svæðinu

Veitur eru að hefja framkvæmdir vegna endurnýjunar á hitaveitu í Austurgötu, Mjósundi, Strandgötu og Fjarðargötu. Tengja þarf hitaveitu við fyrirhugaða nýbyggingu að Strandgötu 26–30 og verður tækifærið notað og lagnir endurnýjaðar sem komnar eru til ára sinna. Tengt verður við núverandi hitaveitulögn í Austurgötu og ný lögn lögð eftir Mjósundi, yfir Strandgötu og að Fjarðargötu. Við Austurgötu verður ónýtur hitaveitubrunnur fjarlægður og lagnakerfið tengt upp á nýtt.

Áætlaður verktími er frá 26. september 2022 til áramóta 2022/2023. Viðeigandi merkingar sem kynna hjáleiðir gangandi og akandi vegfarenda verða settar upp á svæðinu og gera má ráð fyrir aukinni umferð vinnuvéla og öðru raski á meðan framkvæmdunum stendur.

Græn svæði og hönnun sem ýtir undir lifandi miðbæ

Með þessum áformum er verið að svara ákalli íbúa, Hafnarfjarðarbæjar og fyrirtækja á svæðinu um matvöruverslun í miðbæinn, græn svæði og hönnun sem ýtir undir lifandi miðbæ. Sérstaklega er horft til þess að tryggja góða blöndu verslunar-, þjónustu og íbúða.

Ef einhverjar spurningar vakna þá má hafa samband við Guðmund Bjarna Harðarson framkvæmdastjóra: gudmundur@fjordur.is